Related Posts

2017年2月24日

《臺江臺語文學》第二十二期專題徵稿啟事~主題:臺南白話字文學專題

sit期ê專題,號做「臺南白話字文學專題」。有人tō講:「Án-ne,lín nah ē bua̋ i kui-khì號『白話字專題』tō好?」有影!問ê人,有淡薄á歷史siàn-sù!「白話字」、「白話字文學」tsit 2 ê詞,kiau「臺南白話字文學」,意涵、指稱ê à-lù(area)sui-bóng無完全一致,是講tîng-tha̍h ê hit塊,大大塊!Ùi tsit lō事實,thang得1 ê歷史眼界:Tī過去,hit ê百外外冬(-1969)ê「白話字時代」,臺南有i無人有ê角色;ah-sī講,臺南tī白話字文學史ê地位、重要性,無可取代,其他縣市lóng tuè bē tio̍h。

臺南tī白話字發展ê歷史tàu-té有juā重要?Kan-na看當代學者án-nuá定位臺南ê報紙ē知:1885年,巴克禮創辦教會公報ê前身──白話字版《台灣府城教會報》,講是「臺灣現代印刷術的濫觴」,「臺灣新文學ê起點」、「白話文ê開基祖」。1876年,二老口街傳道者速成班kap打狗傳道者養成班合併,tsiânn-tsò「大學」(台南神學校、台南神學院ê前身);巴克禮牧師擔任頭1任院長。南神sui-bóng lia̍h神學教育做宗旨,「白話字」iáu是二次戰前、戰後正式ê課程kap入學試驗科目。Kan-na tsit點,tī臺北ê台灣神學院tō tuè bē tio̍h。Lia̍h外,長榮中學(1885-)、長榮女中(1887-)mā是正式ê白話字教育機關。白話字教育ê基礎單位──教會主日學(小學)sì-kè lóng有,m̄-koh教材、師資tsē-tsē來tī公報社(聚珍堂、新樓冊房)kap大學、中學。頂透下,臺南tsiânn-tsò白話字出版、教育、創作kap閱讀、「消費」ê中心,是臺南ê歷史角色。

本專題ê按算:1.白話字是國家級ê無形文化遺產,ǹg-bāng讀者針對「遺產」tsit ê定位kap臺南ê角色寫文論述。其他子題:2.臺南出身ê白話字作家kap in ê作品,ah-sī有寫tio̍h臺南ê白話字文學作品:白話字文學作品選刊,ah-sī作家論、作品論。3.過去ê白話字教育經驗,ah-sī當代白話字tī臺南復興ê教育現狀。

第22期:2017年5月初5出版、5月15上市;3月20截稿。




本雜誌屬臺語文學刊物,便若屬臺語文學作品,無論詩、散文、戲劇(上濟 5000 字)、小說(上濟 10000 字)、七字仔(有故事性 ê 歌謠)、囡仔歌詩 kap 文學賞析、文學評論(上濟 5000 字)等,攏歡迎投稿,投稿請盡量附作者生活相片、無版權問題ê相關圖片kap 簡要ê 圖片說明文字。

二、書寫文字

以臺語文書寫為主;會得接受少數 ê 文學評論稿以華文書寫。

使用臺語文字 ê 原則:參照臺南市文學獎臺語組徵文 ê 原則,接受全漢字、漢羅濫寫 kap 全羅馬字ê 方式,漢字使用教育部推薦常用漢字(包含異用字)為主,羅馬字採用教育部「臺羅」方案。來稿部份無適當 ê 漢字,本刊有刪改權。

三、截稿 kap 出刊日期
歡迎隨時來投稿。逐期tī 出刊一個半月前截稿。

四、投稿方式

內容包含 word 檔案一份 kap pdf 檔案一份,嘛請填寫作者資料表:姓名、單位、職稱、電話、身份證字號、郵局抑是銀行口座、e-mail、通訊地址 kap 50 字以內 ê 作者簡介,以 e-mail 傳到taikangtaigi@gmail.com,主旨註明「投稿臺江臺語文學」。
若無接著本刊「有收著」ê 回應,請閣來批確認。
來稿一律無退還;請毋通一稿兩投。

五、撰稿格式:
新細明體 12 號,A4 規格。

六、著作權事宜:
錄取 ê 稿件kap 圖片,作者保證無侵害他人著作權 kap 違背著作權法等現行各項法規 ê 行為;若有以上狀況,作者愛家己負擔法律責任並賠償機關損害。

七、來稿若有刊登,會有稿費 kap 彼期季刊兩本。
(註:國外匯款手續繁複koh 雙爿手續費真傷重,投稿者若無臺灣國內銀行iah 郵局口座,就無稿費;請包涵kap 體諒。)